Minangatag di koniab i Mongingigit Amanah Yayasan 1Malaysia, Tan Sri Lee Lam Thye do mooi o Tadau Malaysia poimogonon sabaagi ‘Tadau Malaysia-Tadau Pisompuuvan’ montok popokito pomuginavaan do avi avi layat Malaysia montok iso pomogunan di miiso potindugu.“Tu manaandak tokou tadau kinoponuidongan do Malaysia di ko-48 au no ahaid songovian do Tadau Kemerdekaan ko-54, kosudong tokou do manaak pongumbanganan om pomugivaan kumaa doid ahal monuidong om mamantod pisompuuvan id tatanga do mogiigizn dotokou i nosizun tinau,” ka disido doid iso kopoihaan do doiti di koniab.
Minokianu nogi isido layat Malaysia montok mamadadi do Sabah, Sarawak om Semenanjung Malaysia do hobi sinomok id sunduvan integrasi posoihi om pisompuuvan pogun id 1Malaysia.
“Tadau Malaysia nopo nga mositi dodizon kuasa popiiso montok mogovit do layat mogisuusuvai bangsa songovian do mamahantoi tudu di isooi om montok kahantazan pomogunan diti.
“Mositi o layat Malaysia do monoimo doid tiso om tiso sabaagi layat Malaysia miampai au mongiho bangsa om ugaman om mositi oondos montok popointutun sondii dioho sabaagi layat Malaysia hobi poguhu tu kointutunan miaga diho nopo nga mamantod sunduvan patriotism om monunda pisompuuvan,” ka disido.
Lee, isido ponogi i Timbang Polosidi Yayasan Panahoban Kahasaan Malaysia (MCPF) minoboos do sundung tu pionitan id piahatan tinau id pomogunan Malaysia diti do avasi, au mosito o layat Malaysia mombii aga’an ahal ngaavi kogompit pionitan id piahatan tinau om ugama.
Minoboos isodo do mosito o layat Malaysia do tomoimo opusou kokomoi kasabian ugaman om koubasanan montok kotoonongan id piahatan do tinau.
“Proses monuidong iso pomogunan Malaysia di miiso otindugu nopo nga potihombus, om nunu i nahantoi gisom baino diti nopo nga mositi pogioton om pontodon,” ka disido.
Sabah Times: 12 September 2011
0 comments:
Post a Comment