Shahrizat nakaramit po koponuhuan mongiliu karaja’ nosusuhut kokusutan do Fidlot

Ahal kokomoi do ‘Fidlot’ i kapaampai di Datuk Seri Shahrizat Abdul Jalil do babaino’ diti nokoinlasu’ soira’ di Puru Parlimen Kalabakan Datuk Seri Abdul Ghapur Salleh di konihab minaganu katatapan mononsog di Luguan Koonduan Umno Malaysia dilo’ do mongiliu karaja’.

I Ghapur i po nogi’ Luguan Umno Kalabakan, minoboros do laang dilo’ kiguno onuon di Montiri Kopotundaan Koonduan, Paganakan om Mogiigiyon dilo’ montok manampasi do Barisan Nasional (BN) om Umno id pomilian tagayo pogun do obontol.

“Iti nopo nga iso’ kokusutan di bobos tagayo i naantakan doid susuyan kahandaman koporintaan id sahau kopomuruanan di Luguan Montiri Datuk Seri Najib Tun Razak.

“Nokopoikum-ikum ilo’ dati’ om amu’ tokou mimang do kobolingkahangan diti kopogundaat do BN om Umno,” ka disio pinoposotol.

Tumanud disio, nung koinaru o ahal dilo’ gisom orikot timpu pomilian tagayo, pikiikiro doti’ do kotoguang o BN do kobolingkahangan oingkurian undi om ilo’ po nogi’ do kiguno ilo’ soibahan tosiisikap.

Minoboros i Ghapur do kiguno i Shahrizat momusorou di koundaran do parti sabab kopongunsuban mongiliu karaja’, di pogulu diti pinolombus nogi’ di tongo’ lalansanon Umno di suai kaampai no i bagas Luguan Montiri Tun Dr Mahathir Mohamad.

Pinoboros di Ghapur ahal dilo’ id kapahabaran media katalib pinopoimagon do Ababayan Tangaanak Berkhatan Sorongguugumu’ id Kampung Pasir Putih, do hiti.

Nuhot do pomusarahan disio nung Koonduan Umno kakal monokodung kopomuruanan di Shahrizat, ka disio: “Iti nopo nga’ okon ko’ kokomoi do pogisoosokodungan. Iti nopo nga’ kapaampai do koinsanai parti. Soira’ tokou do kowonsoi kasalaan, mositi’ tokou do maganu tonggungan.”

Id pogun omogot miagal do Amerika, ka disio nung haro toisoiso’ kokusutan kootung di sosongulun lalansanon, lalansanon dilo’ osikap mongiliu karaja’ om sumunsuri sabaagi tanda’ tinonggungan.

“Pembangkang mongomi diti do ‘kopomorompukan doungadau’. Nga’ kiguno tokou karati do i nopo komoyon do pembangkang dilo’ nga’ kointalangan nodi mimpau do kinapabantaan di Luguan Audit Negara,” ka disio.

Montok rikod, ahal kokomoi do Fidlot nopo nga’ kohondot di kokusutan projik kopomogompian sapi’, Longkod Fidlot Kabansaan (NFC) i kapaampai do kolominan di Shahrizat.

Id ahal di suai, nunsub disio o molohing ngaawi’ do poporuput kumaa disio nung haro no sikul id watas dilo’ i minoningkuri’ do tusin koponguhupan kosikulan i pinatahak do koporintaan montok tangaanak diolo’.

Pinosotol disio do tusin nopo dilo’ mositi’ patahakon poinponu’ om amu’ pabayaron do yuran toi susuai po.

Soginumu’ do 200 tangaanak minampai id ababayan berkhatan dilo’ i pogulu dilo’ tinobpusan di Ghapur do waig pogulu pinopotoluod do sandang kumaa potitikid diolo’.

Nokotindapou po nogi’ i Porosidin Kounsol Kakadayan Tawau (MPT) Datuk Ismail Mayakob, Mongongobi’ Rayat Sebatik Abdul Muis Picho, Mongongobi’ Rayat Tanjung Batu Datuk Hamisa Samat, Timbang Luguan Umno Kalabakan i Ismail Ait om i Monunurat Umno Kalabakan Mohd Ayaz Khan.

Adapted From: Sabah Times - Kadazandusun (12 December 2011)

Gambar sekadar kiasan...