Tan Sri Muhyiddin Yassin minonongkisuau miampai vookon monongkibai pitimbungakan Kotoinaan Balajalan 2012, id Seremban, di koniab. Nokotindapou nogi Montili id Koupisan Vozoon Montili Senator Tan Sri Dr Koh Tsu Koon.
8th November, 2012
SEREMBAN: Mongingia, mohoingon mongingia om koponoinaan kahantazan di nakaanu do ijazah mantad po toi id sapalu timpu toi ko id siibo abaabazan Balajalan Tosodu pihion tuutulus kumaa Gred DG41 miampai au tagal tumindapou ponubungan, Tan Sri Muhyiddin pinopoboos di koniab.
Kumoduvo Huguan Montili minoboos mongingia dino kavasa mongupalai tuutulus kumaa Suruhanjaya Kotoinaan Balajalan (SPP) montok pohobuson mantad ponuubungan.
Muhiyiddin i nogi Montili Balajalan nga pinopoboos mongingia di opihi i kitangazan kahantazan id kinavas balajalan om ikhtisas ahapas nokopupus balajalan nga pihion tuutulus miampai au tagal ponuubungan sabaagi mongingia nohuda tumimpuun toun tiiso.
Vuhan nakatahib pinopoboos isido do dumadi mongingia i pihion nopo nga 30 piatus id suang tinimungan dioho miampai kapaasan 9A om anangan id suang boogizan mongingia.
Minoboos isido kiginumu do 2,960 tuhun tinimungan koiso graduan Institut Balajalan Mongingia (IPG) om institusi balajalan takavas polinta (IPTA) id suang boogizan balajalan poguhui ko 1 Vuhan Kotuu, potindoozon naamot do Komontilian Balajalan tumimpuun ko 16 Vuhan Koopod.
Tuubungon izioho do Suruhanjaya Kotoinaan Balajalan (SPP) tumimpuun baino diti gisom ko 6 Vuhan Koopod om Duvo, ka disido ontok minamason pinopoimagon Pitimbungakan Kotoinaan Balajalan 2012 naazu do SPP id doiti.
Minoboos isido montok calon kivaa ijazah ahapas Vuhan Koonom kiginumu 7,755, mositi papataak upalai kumaa SPP tumimpuun ko 1 Vuhan Koopod om Iso id lahan online, mositi mazaa portal SPP (montok calon IPGM) toi ko JobsMalaysia (Calon IPTA).
Vuhan Nakatahib pinopoboos i Muhyiddin do kiginumu 10,715 tuhun graduan IPGM om IPTA i momupus balajalan id suang balajalan nung kahantoi id suang ponubungan, pihion kumaa kalaja Upisol Kotoinaan Balajalan Siswazah (PPS) Gred DG41.
Minoboos isido maamaso polinta mongkimamaan monoodo pakej kalaja mongingia kavavagu id suang piipio fasa montok popoinsavat kualiti mongingia i popoompit pongkimamaan popoinsavat standard kosuangan, popoinsavat kosivatan kotundaan profesional potihombus tumanud kogunaan misosonguhun.
“Iti kaanu nodii mongingia kobuu id suang kalaja tumanud nangangazan om kompetensi, miampai monuidong koubasanan kahantazan profesionalisem kinontodonon tambahut miaga kalaja,” ka disido.
Montok popogiot vazaan kalaja mongingia, Kumoduvo Huguan Montili minonuu SPP mooi do maganu haang pragmatic montok popotindooi toihaan tavasi om vookon haang dino nopo nga mohoingon mongingia tumanud pihi montok popoinsavat motivasi om nangangazan miampai kosivatan koinsavatan pangkat.
Id sambahik dino montok mongintong kalaja mongingia nopo nga mantad boogizan tinimungan di tavasi, ikoton popitongkizad mositi todoon id lahan tavasi kopitanud miampai kosimbanan mongingia sabaagi kalaja pihi, ka disido.
Humansan i Muhyiddin asil pitimbungakan diti aanu monimbang sabaagi kosuangan id suang luputan kotundaan balajalan 2012-2025 i maamaso uhudon.
“Kiangkab zou nogi mangatag do asil pitimbungakan diti aanu moguhud montok dodizon palan haang di miiso mazaa kapanadaan iso makmal montok ampazaton puu mantad Komontilian Balajalan, SPP, Koupisan Kotoinaan Polinta (JPA), PEMANDU, MoF om suusuvai di osoou kosudong.
“Humansan zou mooi pitimbungakan diti adadi hongkod tavasi montok mongintutun kozo toihaan ngavi di tabaa om inovatif kopitanud miampai ikoton kosimbanan pogun montok popoinsavat kualiti sistom balajalan pogun.
“Kosimbanan toi ko kopomouangan vinasi id suang kotoinaan balajalan di potihombus, hoohobi nokozo id boogizan koinsavatan kabaahan om pinghudaan nopo nga kiguno tu ino kunci kopoguhu kumaa kabaahan kotoinaan balajalan,” ka disido.
Kiginumu do 10 kalatas kalaja pinahabus ontok pitimbungakan tohu tadau dino.
0 comments:
Post a Comment